Blank spot

Hopp til menyen

Sykle til jobben?

Tirsdag 18. Mai, 2004

No som vi allereie er inne i sykkelsesongen, «Sykle til jobben»-aksjonen er sparka i gong og folk skaffar seg nye tohjulingar, er det kanskje verdt å repetere kor viktig det er å sykle trygt. Særleg sykling i tett bytrafikk kan vere ei utfordring for oss som er ute i gatene kvar dag.

Heldigvis har vi syklistar ein eigen interesseorganisasjon, som mellom anna jobbar for å gjere det tryggare for oss å ferdast i trafikken. I medlemsbladet På sykkel (nr. 1-2004) gir dei oss 20 tips for å kunne sykle trygt i bygatene (tipsa er noko forkorta og omskrive):

  1. Ver vennleg mot medtrafikantane dine
    Vis omsyn til fotgjengarar, bilistar og andre syklistar og ikkje tvihald på din rett i einkvar situasjon. Ta det roleg og ikkje stress.
  2. Sjå opp for bildører
    Pass på når du syklar langs ei rad av parkerte bilar. Bilar som nett har parkert og hovud som rører seg i bilen bør gjere deg ekstra varsam.
  3. Finn din plass i trafikken
    Prøv å flyte med trafikken. Unngå å stadig veksle mellom fortau, sykkelveg, køyrebane, buss- og parkeringslommer, det kan virke forvirrande for andre trafikantar. Du bør velje gata (køyrebana) framfor fortau. Du har vikeplikt når du syklar ut i køyrebana.
  4. Hald augo og øyrene opne
    Ver merksam på trafikken rundt deg. Ver varsam med å bruke lommestereo og mobiltelefon.
  5. Vis omsyn til vêr og føre
    Hugs at enkelte strekningar kan vere isete sjølv om det ellers ser bart ut. Regn kan føre til dårlegare feste og sikt.
  6. Køyr som bilane når du syklar i rundkøyringar
    Vel felt etter kvar du skal og gi teikn. Er du usikker bør du heller gå av sykkelen og bruke fortau og gangfelt.
  7. Ha orden på utstyret
    Sørg for at sykkelen er i teknisk god stand. Det er påbode med fram- og bakbremser, refleks og ringeklokke. Lykt framme og bak er påbode når det er mørkt. Ver merksam på at nyjusterte frambremser har ført til ulukker, fordi hard nedbremsing har ført til at sykkelen går rundt.
  8. Vel rute som passar for deg
    Nokre føretrekk den kortaste ruta, medan andre legg meir vekt på trafikkforholda og omgivnadene rundt.Føler du deg vel langs ruta di, vil du sykle tryggare.
  9. Søk blikkontakt med medtrafikantane dine
    Sjå etter signal frå andre medtrafikantar. Blikkontakt skapar ei felles forståing for trafikksituasjonen.
  10. Unngå å sykle med promille
    Promillekøyring med sykkel er straffbart om du på grunn av alkohol ikkje kan køyre på ein trygg måte.
  11. Følg trafikkreglane
    Raudt betyr stopp, uansett om du syklar i køyrebanen eller skal krysse over eit gangfelt. Syklar du i sykkelfelt må du følgje køyreretninga for vegen. I einvegskøyrde gater er det forbudt og ofte farleg å sykle mot køyreretninga.
  12. Ver merksam på bussar, trikkar og lastebilar
    Pass alltid farta når du nærmar deg haldeplass for buss eller trikk. Ver merksam på passasjerar som stig av og på bussar eller trikkar, og særleg varsam når du syklar på innsida av bussar og lastebilar i sving.
  13. Vis kvar du skal
    Når du syklar i køyrebanen er det viktig at du ved hjelp av teikn, plassering augekontakt, viser kva du har tenkt å gjere.
  14. Bruk hjelm
    Hjelm kan redusere skader når ulukka er ute. Men hugs å skifte ut hjelmen om den har fått synleg skade, eller vore utsett for mange slag.
  15. Gå over gangfelt når det er mykje trafikk
    Det er tryggast å gå over vegen når det er mykje trafikk. Det er tillate å sykle over gangfelt, men då er det du vikleplikt.
  16. Bruk sykkelfelt og sykkelvegar der dei finnast
    Sykkelfelt (eige køyrefelt for sykkeltrafikk i køyrebanen) bør nyttast om den finnast. Det kun tillate å nytte sykkelfelt på høgre side i køyreretninga. Sykkelvegar er berekna for sykkeltrafikk i begge retningar.
  17. Vel passande sykkel
    Det gjeld å ha ein sykkel som passar til ditt bruk. Ved sykling i byen bør du ha sykkel med noko breie dekk (pga. trikkeskinner, kumlokk, fortauskantar osb.) og nokonlunde rett sittestilling.
  18. Hald avstand til fortauskantane
    Ved å sykle omlag ein meter frå fortauskanten blir du lettare lagt merke til og rekna som eit køyrety. Dessutan unngår du hindringar som avløpsrister, søppel, bildører som brått opnar seg og fotgjengarar på veg ut i gata.
  19. Sjå opp for hindringar
    Trikkeskinner, kumlokk og avløpsrister kan vere glatte når det har regna. Det same gjeld for gangfelt og andre malte symbol på asfalten. Pass opp for sand og grus.
  20. Ver merksam ved forbikøyringar
    Det er lov å sykle forbi biltrafikk både på høgre og venstre side. Stilleståande eller saktekøyrande kø kan ein med fordel køyreforbi på høgre side. Men om du syklar forbi på høgre side bør du vere ekstra varsam — det er nemleg ikkje alle bilistar som merksam på trafikk på høgre side.

Fritid

Forrige | Neste

Kommentarar

Av: Lasse G. Dahl, 19. Mai 2004, kl. 14.46

En flott liste - selv om den kanskje er litt lang? Det er vanskelig å se prioriteringene når den er 20 punkter lang, liksom …

Men spesielt viktig vil jeg si at punktene 4, 9 og 11 er — og siste punktum i punkt 6 vil jeg oppheve til en «gylden regel» når det gjelder sykling i by og trafikk:

«Er du usikker bør du heller gå av sykkelen og bruke fortau og gangfelt».

Hvis man ikke vet hvordan man skal komme seg over et uoversiktlig kryss, hvor bilene kommer fra ved en utkjøring, hvilke biler som er parkert og hvem som bare står i kø, om det er for mange fotgjengere rundt omkring til å sykle og så videre — så gå av sykkelen og lei den. Da har du mye bedre oversikt selv, og du beveger deg langsommere og blir derfor mye lettere å få øye på for billistene.

Av: Chris, 20. Mai 2004, kl. 23.21

Ja, lista kan virke litt lang, og der er enkelte ting som går att i fleire av punkta. Men eg skjønar godt at forfattarane har sett på teskjei-modus under arbeidet med denne artikkelen.

Å sykle i tett bytrafikk er ikkje noko ein skal ta lett på, noko eg har kjensla av at ein del kanskje gjer. Ellers er eg einig med deg i kva dei essensielle punkta på lista er.

Søk


Om meg

Innhald

Driven med Movable Type