Tirsdag 25. Mai, 2004
Ellen og eg har lenge tenkt på å kome oss meir ut i naturen, og har etter kvart fått investert i — og brukt — ein del turutstyr som jakker, sekkar, støvlar og kokeapparat. No har vi utvida utstyret med eit aldri så lite telt!
Teltet er av eit slags kjempelett, tomanns kuppeltelt av merket MSR og modell: Hubba Hubba. Etter å ha plaga personalet ved Fritid-Sport her i Bergen og fått dei til å setje opp teltet i den bittelille butikken, så drog vi derifrå med teltpakken under armen.
Men vi bar ikkje tungt; 1,8 kg er ikkje mykje å dra på når vi snakkar om eit tomannstelt med to dukar. Vi har til og med fått sett det opp heime i stova, noko som tok mindre enn 5 minutt — glimrande! Så no er vi svært spent på å få brukt det ute i naturen, noko vi har tenkt å få gjort ein del i løpet av sommaren.
Om andre har lyst til å prøve ut dette teltet på ein ordentleg tur, så har dei visst eit demonstrasjonstelt til utlån. Og eg som eigentleg var på utkikk etter ein sekk. Meir om teltet kjem, så snart vi har fått testa det.
Av: Chris, 26. Mai 2004, kl. 17.57
Litt meir om sekken: Eg var nemleg innom Fritid-Sport dagen før, og hadde sett meg ut ein sekk som passa perfekt til meg. Dei hadde sal på utgåande modellar, noko som gjorde det enda meir fristande. Men så var eg usikker på om pengane ville strekke til, så eg måtte heim og sjå over finansane mine først.
Dagen etter var eg så innstilt på å få meg ny sekk, men nedturen var stor då eg oppdaga at dei hadde seld den eine sekken som eg hadde tenkt å kjøpe meg.
Men for ikkje lenge sidan oppdaga eg at dei hadde sal på same serien med sekkar i nettbutikken Sportsnett. Dei hadde same storleik til same pris og eg slo til med det same. Så då er det ikkje lenge til at sekken er meg i hende.