Torsdag 03. April, 2003
Denne dagen byrja fint, opp og ut på sykkelen tidleg om morgonen på veg til skulen. Himmelen var blå og eg sykla forbi køer av bilar på veg mot sentrum. Ved Haukeland Universitetssykehus tok eg av frå Nattlandvegen ved og sykla nedover Ibsensgate.
Sjåføren i ein mørkblå bil framfor meg bremsa ned i dei trange partia, med ein lang kø av bilar i motsett køyreretning, så eg tok tak i bremsehandtaka og klemte forsiktig, så: PANG! Rett på trynet, så det sang! Så sklei eg bortover vegen med eine foten fast i sykkelen. Heldigvis slapp eg unna utan fysiske skader og var det berre mindre materielle skader på sykkel og kleda. Så det var berre å kome seg ut av vegen, rette på styret og legge i veg att.
Halve vegen var fuktig, det hadde eg registrert, men at det skulle vere såpeglatt, det kom som ei svært ubehageleg overrasking. Eg burde vel eigentleg skjønt at det kunne vere glatt, i og med at eg oppe i Nattlandsvegen hadde sklidd på ein liten issvull. Eg kan tenkje meg at det såg lite lurt ut for bilane som stod i kø, der eg sklei på magen bortover asfalten.
Ser ut som om eg må få meg ei ny Gore-Tex™-jakke — og investere i sykkelhanskar.