Mandag 23. September, 2002
Etter at vi, eg og Ellen, endeleg kom oss opp og ut etter nattevakt, fekk vi med oss vener på kinobesøk. På plakaten stod «Austin Powers 3: Goldmember». Filmen var glimrande (i alle fall den dagen), akkurat nok prompehumor til at trøtte kroppar fekk trimma lattermusklane. Kinobesøket vart avslutta med ein kort tur på kafé.
Dagen byrja med ein tur innom Posten, som arrangerte loppemarknad for 3. helg på rad. Men det bar òg utvalet preg av. Så var vi innom Zachen og fekk med oss ein smakebit av Forskningsdagane, mellom anna ein debatt om det å vere utbrend. Debattantane var professorane Holger Ursin og Frode Thuen. Eigentleg skulle eg innom eit seminar om blogging, men denne diskusjonen var interessant. Deretter tråla vi byen rundt etter ein gåve til Vidar, som skulle feire ein forseinka 24-årsdag denne dagen.
Så var det fest på kvelden. Ein koseleg fest med vener, slik koselege festar med vener skal vere. Bortsett frå at festen slutta med ein svært engasjerande diskusjon, noko som ikkje er alltid like heldig når ein har hatt eit visst alkoholkonsum i tida før. Men det heile enda lukkeleg for dei involverte.
Dagen før vart svært lang og gjorde sitt til at dagen etter vart tilsvarande kort. Men sol og varme (og ein telefon frå Øyvind og Maren) fekk oss endeleg opp og ut i frisk luft. Ein sykkeltur til Lille Lungegårdsvann gjer godt for ein sliten kropp. Så vandra vi til Vågen Fetevare, der det gjekk i alt som var flytande og bra for den skeive væskebalansen. Og kortspel.
Alt i alt ei koseleg helg.