Mandag 26. August, 2002
Å ete ute er ikkje alltid det same som å bruke ei formue på mat, eller å kjøpe usunn snøggmat. Her følgjer fem tips til eit billeg måltid med rask servering ute i Bergen:
Dette er staden for billeg og god pasta-mat. Her er det mykje å velje mellom, både av kjøtrettar, sjømat og vegetarrettar. Ikkje nok med det, dei lagar òg pizza i ein ekte steinovn. Porsjonane er så store at ein av og til kan klare seg med halve porsjonar. Ja, forresten, dei serverer det òg.
Har du lyst å nyte maten heime, kan du ta med deg ferdige rettar eller kjøpe pasta og diverse tilbehør. Pastasentralen ligg mellom Bygarasjen og fylkeskommunebygget.
Er du glad i kinesisk mat? Er du glad i sterk, verkeleg sterk, mat? Då er Sze Chuan House staden for deg. Sze Chuan er ein provins i Kina som er kjend for svært godt krydra rettar, og etter eit besøk i denne restauranten skjønar du kva dei meiner med sterk.
Lunsjrettane er rimelege og smakfulle, men er lokala for små og tronge for deg, kan du gjerne ta med deg maten heim. Sze Chuan House ligg ved Korskyrkja, ikkje så langt frå Vågen Fetevarer.
På Landåstorget ligg San Marino Pizzeria. Dei serverer truleg den billegaste og raskaste pizzaen i Hordaland. Vi har faktisk opplevd å få køyrd ein pizza heim til oss på 10 minutt! Dei har òg servering i restauranten, og pizzaen er fortreffeleg.
Studentsenteret på Nygårdshøyden er berre ein av fleire stader der SiB har kantine med servering av rimelege måltid for fattige studentar. Det er planlagd å byggje eit nytt bygg som skal huse Studentsenteret, men det står att å sjå. Inntil vidare får vi klare oss med dei store, slitte lokala til kantina.
Ved skulestart er det gjerne sett opp gratisbussar for å frakte studentar med lommene fulle av studielånspengar ut til IKEA i Åsane. Kvifor ikkje nytte høvet til ein porsjon svenske kjøtbollar for ein rimeleg penge? Her gjeld det å styre unna helgene om du ikkje er glad i å stå fleire timar i kø. Eit lite tips: Ber du om ekstra stor porsjon, så får du ein ekstra stor porsjon, mot eit lite tillegg i prisen. Dei serverer forresten andre rettar enn kjøtbollar òg.
Eg tek imot fleire tips om stader som er rimelege og som serverer god mat her i Bergen